صباح الحب
طبعا المكتوب مبين من عنوانه
في شغلات تسوينها وانتي غافله لكن تعطي للاشخاص انطباع انج وحده ملقوفه وماعندج لباقه
تعالو معاي نشوفها .....................
مستعدين ؟؟؟
استعداد
انطلاااااااااااااااااااااق
1- اذا كانت وحده قاعده يمج وماسكه تلفونها ولا شعوريا طليتي فيه او عينج نطت عليه وشافتج .... مو عيب ؟؟؟؟ هاي اكثر الحركات الي تقهرني من البنات لما اكتب مسج او اشوف شي بالتلفون لازم في راس غير راسي يطل بالتلفون ... والله عيب تراها لقافه كبري مخج شوي الناس لها خصوصيات
2- كل انسان يمرض واللهم لا اعتراض ,,, وكل انسان لابد ان تصيبه افلونزا او زكام
ليش تعطسين بويه الناس بدون ما تغطين فمج ؟؟؟؟
ليش لما تطلعين الي بانفج تحطين الكلينكس وبصوت عالي طوط طوط طوط ؟؟؟؟
حاولي تسوينها خفيفه يعني كلما زاد الصوت كلما زادت الانوثه ؟؟؟
امس مسكينه وحده قاعده يمي بالمحاضره ما اعرفها بس بطت اذني من صوتها وهي (......) الله يشفيها من الزكام
باختصار حتى وانتي مريضه لازم يكون عندي لباقه واتكيت اليس كذلك ؟؟
3- طبعا رسولنا صلى الله عليه واله وسلمه لا ينطق عن الهوا
وهذا حديث للرسول صلى الله عليه واله وسلم
وعن أنس رضى الله عنه قال: كان رسول الله صلى الله عليه وسلم إذا أكل طعاماً،لعق اصابعه الثلاث، وقال:"إذا سقطت لقمة أحدكم فليأخذها، وليمط عنها الأذى، وليأكلها،ولا يدعها للشيطان"
المهم الي استفدناه من سنه الرسول ان من السنه لعق الاصابع وليس مصها بعد الاكل
مره بالجامعه كنت قاعده مع وحده ناكل ويت وحده ما اعرفها بس تعرف صديقتي وهي بنت ماشاء الله متدينه وقعدت معانا بعد ما خلصت الاكل قامت تمص اصابعها وتطلع صوت قوي كانه طفل يمص صبعه
انا استغربت وصديقتي قالت لي اليوم الثاني ان من السنه لعق الاصابع بعد الاكل
زين لعق وليس مص بهذه الطريقه وبصوت
ليش اخراج الصوت ؟؟؟ يعني لازم تسمعين الجيران انج تطبقين السنه ؟؟؟؟
4- انتي وحده تحبين الدلع والفرفشه وعادي تحطين العلكه وتتمشين فيها جدام خلق الله وما عليج رجل او امرأه ولا تهتمين بالناس شنو راح تقول ما يخالف احنا سكتنا وقلنا انتي بكيفج
لكن تقعدين تطقين العلك بصوت وتسوين بالونه ليش ؟؟؟ على بالج روحج عمرج 5 سنوات ؟؟
والله في ناس من زود ما يطقون العلك بصوت ما تقدرين تركزين بالي تسوينه
على بالهم دلع ........ لا خيره الله بالدلع اذا كان جذي
5- تتكلمين بالموبايل , ما يخالف الموبايل انصنع عشان الواحد يقضي اموره وهو في مكانه ,, ليش الكلام بصوت مرتفع تسمعين القاصي والداني ,, لازم يعرفون انج تتهاوشين مع زوجج ؟؟ لازم يعرفون ان توصين الخدامه على ولدج ؟؟ لازم يعرفون ان امج متصله تتطمن عليح وتحاتيج ؟؟ لازم يعرفون ان صديقتج مادري شفيها ؟؟؟
من الاتكيت الحديث بصوت واطي ومو بس لباقه هذي الا نوع من انواع النعومه والرقه الي لازم تكون بالانثى ...
6- قاعده بامتحان تحلين ومندمجه ما يخالف الله يوفقج ويسهل عليج ليش تشتتين فكر الناس ؟؟ تهزين برجلك هز وكانه مصيبه صايره
فكري بالي وراج قاعده والي قاعدين حولج يبون يركزون عيب الواحد ما يفكر الا براحته ولا يفكر براحه الناس انا اعتبرها قمه الانانيه
ممكن تكون لا شعوريه بس هالمره انتبهي .......
7- الهديه وما ادراكم ما الهديه هاي اتكيتها يطول
احد ياب لج هديه عندج منها او عندج شي يشبهها ما يحتاج تقولينله بويهه قولي شكرا وانتي ساكته لازم تفشلين راعي الهديه ؟؟
راح تهدين لاحد يعني لازم تخلين السعر هاااا شوفو انا ما اشتري الا الغالي وتسوين روحج ناسيته ؟؟ زين شيليه مو مهم السعر المهم المعنى
هديتي لاحد هديه وما علق ويا كثر ما تصير لازم تسألينه عن رايه فيها ؟؟؟ مو لازم ..يبي يعلق والا بكيفه المهم انها وصلت عيب تسالينه شرايك وشنو شعورك وهل عجبك اللون او لا ؟؟
الهديه لو راح نشرحها ما راح نخلص يطول الشرح فيها
8- قاعده تاكلين ومندمجه وتسولفين
زين خلي يمج قطعه منديل مسحي فيها فمج لازم الاكل سايح والجبن دار مدار فمج وانتي ما تدرين والناس تطالع ؟؟؟
او جدام زوجج لازم يقولج مسحيه وتتفشلين ؟؟؟
لو بذكر كل المواقف الشرح يطوووول
خلنا على هالكم موقف
واتمنى اني ما غثيتكم بس هالاشياء الاحظها وما اتكلم واجمعها عشان ايي هني ابرد قلبي
يمكن انا بعد فيني شغلات ما اشوفها وغيري يشوفها ترا ما في انسان كامل
الجمعة يناير 04, 2008 12:52 pm